កាលពីមុនលោក សមរង្ស៊ីបានចោទ លោកហោ ណាំហុងថា ជាមេគុកបឹងត្របែក ក្នុងសម័យខ្មែរ
ក្រហម ហើយលោក ហោ ណាំហុង បានបកស្រាយថាគាត់មិនមែនជាមេគុកបឹងត្របែកដូចការចោទប្រកាន់ នេះទេ ព្រោះគាត់ក៏ជាជនរងគ្រោះជាប់គុកបឹងត្របែកដែរ។ ក្រោយមកលោក ហោ ណាំហុង បានប្ដឹងលោក សមរង្ស៊ី រួចតលាការស្រុកខ្មែរបានកាត់ក្ដីដោយអោយលោក សមរង្ស៊ីចាញ់ក្ដី។ ប៉ុន្តែលោកសមរង្ស៊ីនៅតែប្រកាន់ជំហររបស់គាត់ថា អ្វីដែលលោកបានចោទ នោះគឺជាការពិត រួចក៏បន្តរប្ដឹងផ្ដល់គ្នាដល់តុលាការអន្តរជាតិ។ តុលាការអន្តរជាតិបានកាត់ក្ដីអោយ លោកសមរង្ស៊ីជាអ្នកឈ្នះវិញម្ដង។
ថ្មីនេះដែរ នៅសវនាការសាលាក្ដីខ្មែរក្រហមនៅពេលនេះ បានផ្ដោតការពិភាក្សាដេញដោលសំខាន់ទៅលើអង្គហេតុនានា ទាក់ទងទៅនឹងក្រសួងការបរទេសនៃរបបកម្ពុជាប្រជាធិបតេយ្យ។ សាក្សីដែលឡើងមកបំភ្លឺអង្គជំនុំជម្រះ បានឆ្លើយដូចតទៅ:
លោក អានឌ្រូ អ៊ីអានូហ៊្សី សួរ៖ «តើគាត់ជាប្រធាន ឬអនុប្រធាននៅបឹងត្របែកនោះ ទាក់ទងទៅនឹងលោក ហោ ណាំហុង នេះ?»
សាក្សី រចឹម ទន់ ឆ្លើយ៖ «កាលទទួលគាត់កាលនោះ ក្នុងនាមគាត់គ្រប់គ្រងនៅបឹងត្របែកហ្នឹងដែរ។ ក្នុងគ្រប់គ្រង!»។
សាក្សី រចឹម ទន់ ថ្លែង៖ «បាទ! ពិតអ៊ីចឹងហើយ។ គាត់នៅបឹងត្របែកនោះ វាយូរ។ ដល់ខាង ប១ ទៅទទួលហ្នឹង គឺមួយរយៈខ្លី។ មុនគាត់មកធ្វើការនៅក្រសួង ពីមុនខ្ញុំក៏ក្ដាប់មិនបានដែរ។ ប៉ុន្តែ ដូចខ្ញុំបញ្ជាក់មិញអ៊ីចឹង គឺគាត់នៅក្នុងរង្វង់ការងារទូតហ្នឹងហើយ ខ្ញុំបញ្ជាក់អ៊ីចឹង»។
លោក អានឌ្រូ អ៊ីអានូហ៊្សី សួរ៖ «តើលោកយល់ស្របដែរឬទេថា លោក គាត ឈន់ ជាកម្មាភិបាលជាន់ខ្ពស់មួយរូប នៅ ប១ នោះ?»
ក្រៅពីការបញ្ជាក់អំពីលោក ហោ ណាំហុង សាក្សីក៏បានលើកឡើងអំពីឈ្មោះលោក គាត ឈន់ ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបច្ចុប្បន្ននេះដែរ។ សាក្សី រចឹម ទន់ ជម្រាបអង្គជំនុំជម្រះថា លោក គាត ឈន់ ក៏មានតួនាទីផ្នែកការទូតម្នាក់នៅក្រសួងការបរទេសនៃរបបកម្ពុជា ប្រជាធិបតេយ្យ។ (មើលព័ត៌មានបន្ថែមអំពីលោក គាតឈន់ សូមចុចទីនេះ ) ។
សាក្សី រចឹម ទន់៖ «គាត់ជា កម្មាភិបាលជាន់ខ្ពស់មួយរូបដែរ នៅក្នុងក្រសួងហ្នឹង។ ពិសេស កិច្ចការខាងនយោបាយខាងក្រៅ គាត់មានពិសោធន៍ច្រើនលើការងារទូត។ ការទំនាក់ទំនងអីផ្សេង គាត់មានពិសោធន៍»។
ដកស្រង់ពីអាស៊ីសេរី។